محسوس ہو کہ درد کا احساس مر گیا

محسوس ہو کہ درد کا احساس مر گیا
اتنا سکوں بھی شام جدائی نہ دے مجھے

پہلو میں اک شور قیامت بھی ہو بپا
اور بےخودی بھی وہ کہ سنائی نہ دے مجھے

تیرا قفس رہے نہ میرا آشیاں رہے
صیاد حکم نغمہ سرائی نہ دے مجھے

یہ تیرا حکم ہے تو مجھے یہ سزا قبول
میرا خیال ہے تو رہائی نہ دے مجھے

اے شوق دید دیکھنا ہمت نہ ہارنا
اے حسن جلوہ بار دکھائی نہ دے مجھے

پہنچے ہیں بام سے ترے جلوے نگاہ تک
نکلے بھی چاند اور دکھائی نہ دے مجھے

غنچہ کھلے تو تار رگ جاں کھنک اٹھے
دل ٹوٹ جائے اور سنائی نہ دے مجھے

اک ایسے پردہ دار کہ مجھ کو تلاش ہے
جس کا سراغ ساری خدائی نہ دے مجھے