اگر ہے جرم محبت' تو کر کے دیکھیں گے

اگر ہے جرم محبت' تو کر کے دیکھیں گے
ہم اپنی حد سے کسی دن گزر کے دیکھیں گے

یہ بحرِ خون ہے کہ آتش مگر یہ ٹھانی ہے
ہم ایک بار تو اس پار اتر کے دیکھیں گے

اسیرِ شب ہی سہی آنکھ میں اگر لو ہے
ہزار رنگ طلوعِ سحر کے دیکھیں گے

مسافرت میں گزرتی ہے جن کی عمر، وہ لوگ
کبھی تو سقف و در و بام گھر کے دیکھیں گے

ہم ایسے خاک نشینوں کو بھی بشارت ہو
کہ پاؤں اوجِ ثریا پہ دھر کے دیکھیں گے