مسلمان ځوان

بسم الله الرحمن الرحيم
الحمد لله والصلاة والسلام على رسول الله، وعلى آله وصحابته أجمعين.

ځوان څوك دى؟

علماء ځوان داسې تعريفوي: ځوان هغه څوك دى چې د ژوند لپاره يو لوړ هدف ولري او بيا د هغه د تر لاسه كولو په لاره كې پرلپسې هڅې كوي. او بيا يو مسلمان ځوان خو بايد ډير لوى اهداف د ځان لپاره وټاكي چې هغه په هر ډګر كې د خپل هيواد پرمختګ، اسلامي امت ته تير برم راګرځول، په ځمكه باندې د الهي قانون پلي كول او د الله تعالى د رضا او جنت لاس ته راوړل دي.

د مسلمان ځوان ځانګړتياوې:

هر مسلمان ځوان بايد لاندې ځانكړتياوې په ځان كې را منځ ته كړي. هغه بايد پياوړى بدن، نيك اخلاق، سالمه عقيده او اسلامي فكر ولري، له حلالو نه تغذيه او له خپل نفس سره جهاد وكړي، د وخت ارزښت وپيژني او د ټولنې لپاره د يو ګټور انسان په توګه ژوند وكړي.

ملتونه په ځوانانو ارزول كيږي

پوه شئ چې د ټولنو ارزښت او پايښت تر ځوانانو پورې تړلى دى، ټولن پيژندونكي له همدې لارې كولاى شي دا اټكل كړي چې كوم دولت تر څه وخته پورې پايښت لري او كله به غورځيږي. هغوى د دې كار لپاره پوهنتونو، ښوونځيو او نورو تعليمي ادارو ته ځي او د ځوانانو د كوښښ او هڅو كچه ارزوي، همدا ډول د هغوى د هيلو او لوړو اهدافو په هكله معلومات را ټولوي او بيا د هغې په رڼا كې د هغه ملت د راتلونكي په هكله وړاندوينه كوي.